ايه هو ضعف مخزون المبيض؟

ايه هو مخزون المبيض؟

-البنت بتتولد بعضو شمال و عضو يمين الرحم اسمهم المبيضين و هما عباره عن حصالة بتشيل البويضات الي بتتولد بيهم و يخرج منهم بويضة كل شهر للحمل بعد البلوغ.

بيضعف مخزون المبيض ازاي؟

-كل ما السن بيتقدم او عيب خلقي ان البنت مولوده بعدد بويضات اقل من العادي او امراض زي بطانه الرحم المهاجرة او العلاج الكيماوي للسرطان او عمل عمليات جراحيه كبري بدون داعي او مع طبيب غير محترف زي منظار بطن بدون داعي او شيل كيس مبيض كان ممكن يتعالج بالدواء.

بيتقاس ازاي مخزون المبيض؟

-عمل تحليل FSH تاني يوم دوره او AMH في اي يوم او سونار مهبلي يقيس عدد البويضات الصغيره الي المبيض طلعها للشهر الحالي و بيتقسم إما ضعف بسيط او متوسط او كبير

بيتعالج ازاي ضعف مخزون المبيض؟

– مفيش علاج بيخلق بيض لان المبيض مش مخلوق انه يخلق بويضات زي ما الرجل خصيته بتخلق حيوانات منويه. فكل العلاجات الي بتوعد بزياده بيض او مخزون عبارة عن وهم و خداع

– بنتعامل مع الوضع الحالي بمقويات لتحسين الجوده و بروتوكولات هرمونات مخصصه لكل حاله عشان يخرج بويضات مناسبه

ايه المفاهيم الغلط في ضعف مخزون المبيض؟

-ارتفاع هرمون FSH او انخفاض AMH هما السبب في مشكله المخزون و اخد دواء ليهم هيعلي المخزون. الهرمونات دي مجرد انعكاس لحاله المبيض و التلاعب فيهم مش هيعمل حاجه للمخزون

-عمل تنشيط او حقن مجهري بيخلص المخزون. في العادي كل شهر بيطلعلك عدد بيض صغير هيكبر منهم واحده تحملي بيها و الباقي يموت ولو اخدتي منشطات كلهم بيكبروا و مفيش حاجه تموت فالتنشيط او الحقن المجهر مش هياخد بيض زيادة عن الي بيخرجلك شهري فمفيش تأثير على مخزونك .

-الي مخزونها ضعيف متحملش طبيعي. لا تحمل طبيعي و بنصبر عليها لو سنها صغير اما كبيرة السن بنعمل حقن مجهري

-في دواء بيزود البيض. مبيضك مخلوق انه حصاله بس ميقدرش يكون بيض فاي حد يسوق دواء جديد انه بيزود مخزون يبقي للاسف وهم

-دواء داهيا علاج لأي حاله ضعيفه. الدواء حلو بس لحالات معينه و لو اتاخد غلط يقلب عكسي

#ضعف_مخزون_المبيض

#دكتور_اشرف_صبري

الكاتب: DrAshrafSabry

استشاري علاج العقم و الحقن المجهري و النساء و التوليد.